| 01698 博士蛙國際 | 即時 按盤價  1.680 0.000 (0.000%) |
| 公司資料 |
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
| 01698 博士蛙國際 | 即時 按盤價 1.680 0.000 (0.000%) |
| 公司資料 |
|
| 備註： | 即時報價更新時間為 20/03/2012 18:04 |
| 港股實時基本市場行情由香港交易所提供; 香港交易所指定免費發放實時基本市場行情的網站 |
蛤乸畀車車死咗
2012年03月16日
昨日最爆的新聞唔係中移動(941) 股價及相關新聞 的業績，而係阿爺突然將重慶市委書記薄熙來打柴，同埋隻博士蛙(1698) 股價及相關新聞 爆大鑊停牌。
前年博士蛙上市時好受歡迎，一度榮登「凍資王」，佢原定於月底公佈業績，昨日早上8點半忽然發公告話因核數師德勤關黃陳方辭任，透露核數師話有一些佢哋需要的資料攞唔到，無法完成審計，公司要換核數師，所以推遲業績公佈期。
博士蛙份通告無講德勤攞唔到乜嘢料，上午開市隻股照買賣，隻股一開都跌18％，點知呢個已經係最佳逃生位，之後急插，15分鐘已插落低位，跟住打橫行，股價勁跌35％，中午時以1.68元收市，成交額好大，成咗3.9億股，金額6.7億元。扣除博士蛙兩大股東持股的56%，街貨有9.1億股，以昨日上午有43%街貨轉咗手，呢批股東就真係走得快好世界啦，因為跟住仲大鑊。
半日交易走一半貨
到中午12點半，博士蛙再出個補充通告，講述核數師德勤辭任函件提出的質疑，指博士蛙與一個供應商的3.92億元人民幣預付款的「存在性和商業實質性」有可疑等等。嘩，指控極其嚴重，等如懷疑帳目有假嘢。出完呢個通告，隻嘢仲停埋牌。
問題係博士蛙情況咁嚴重，點解開市前出個交代得唔係咁清楚的通告可以開市買賣？
係唔係要佢交代清楚啲先至畀佢交易好啲？如今講咗一半就開市，客觀效果係有一批股東沽貨走咗，另一批人傻傻哋入咗去接貨，睇佢個款好似係「長停公主」，若指控屬實，復唔復得番牌都係一個問題。
呢個故事教訓我地，做「撈底王」之前，要先問吓「隻股係唔係一定唔會執笠？」若無肯定答案，就唔好撈啦。
我記得博士蛙上市前夕和同個中環茶友傾開偈，都話佢盤數又係「too good to be true」(好到無人信)個種，2008年賺4000萬，09年賺1.2億，2010年賺2.5億，開舖賣童裝真係咁好賺？過千間舖，自營店又好，特許經營店又好，條數真假真係好難查。茶友當日已經話，有咁大隻蛤乸隨街跳，都好易畀車車死喎，結果兩年後不幸言中，隻蛤乸真係畀車車死咗。散戶若睇住零售概念就去買股，對隻股啲生意得唔得無甚理解的話，其實同賭大細差唔多。
重慶股受靶要捱
阿爺一開完人大政協，就宣佈政治局委員、重慶市委書記薄熙來打柴，由另一政治局委員張德江暫代佢出任重慶市委書記，薄公子過去幾年大玩「唱紅打黑」，想爭下屆政治局常委第九個位，今次鬧出王立軍事件，原來人大開會期間出來露一露面，已經係佢最後表演。
內地股市昨日只是微跌0.7％，港股最後只反升45點。一朝天子一朝臣，香港上市的重慶股部份都跌好多，好似重慶農商銀行(3618) 股價及相關新聞 跌3％，中渝置地(1224) 股價及相關新聞 跌5.7％，其餘都無大郁。
最後講兩句中移動(941) 股價及相關新聞 全年業績，佢純利1259億元人民幣，升5.2％，每股盈利6.27元，符合市場預期。末期息每股1﹒747港元，同已派發中期息1﹒58港元，全年派息3.327港元，息率都有3.9厘，都有啲交代。
中移動去年每戶收入(APRU)僅跌2.3%，已較前年4.7%收窄，佢話今年將加強數據流量和3G業務，希望APRU穩中有升。雖然中移動條數無大驚喜，但全球在炒電盈股，佢公佈完業績股價都升0.5％，市場叫做收貨啦。
陸羽仁
爛尾股
2012/3/19 上午 09:45:34
網誌分類: 經濟
我在專欄再寫了博士蛙呢隻上市一年半的股份，忍唔住再要講兩句近排半新股表現。和博士蛙同日上市的碧生源(926)股價及相關新聞 ，剛公布去年全年業績轉盈為虧，蝕鰦4087萬元，營業額亦下跌3.4%，做減肥茶的碧生源2010年上市時都相當熱，佢挾住09年上市前賺1.4億的靚數上市，但2010年上市那一年已跌到只賺5966萬元，大家要注意2010年大陸市道未轉差，佢業績已大倒退，去年更變為蝕錢，有無咁化學呀?
最近上市那隻按摩產品商豪特保健(OTO，6880)，上市僅3個月，竟然發盈警，話盈利要按年大跌45%至55%，和原本預測增長逾三成，差天共地，幾個月竟然有咁大變化?
新股咁搞法，咁多爛尾股，監管有責，過去股民起碼對新公司上市那年的盈利預測有信心，之後就難講鱓，但咁多新股連上市那年的盈利都跌得咁離譜，真係好難投資新股，頂多只能短炒。相信新股保薦人好熟例，唔會犯例，但監管機構見人咁打矛波，起碼都可以整黑名單，或者發下警告躀?
講番美股，上周連升幾日，周五尾市終於倒跌收場，埋單計數，全個星期仍有超過2%的可觀進賬。杜指及標普500指數都跨越重要關口13000點及1400點。杜指報13233點，標普500指數收1404點。杜指連升七日後，上周五氣，都好合理。
當日先升後回，杜指跌20點，主要受3月密执安大學消費者信心指數意外下降至74.3，不過跌幅唔算大，只係大約1個百份點，相信係市場憂慮燃料價格不斷上升，影響經濟復甦的動力，因為汽車燃油佔了美國人消費好大部份。不過相對原油價格由年初的每桶99美元升到最新的107美元，升了8%，汽油價格漲了9%，消費者信心都算企得好硬。
股市的「恐懼指標」VIX指數更係愈跌愈跌愈低，上周五更不升反跌6%至14。主要原因係希臘收到「救命錢」，又完成換債券計劃，避免了即時違約危機。市場預計到希臘4月大選前都應該唔會再爆大鑊，歐洲無鑊爆，投資者聚焦國內經濟，美國經濟數據近期又幾靚仔，尤其係就業數字不斷改善，雖然失業率仍高，但首次申領失業救濟人數創了四年新低。工廠產出穩步增加，零售這兩個月亦逐步跟上，反映企業開始增加招聘，美國人多了錢花費，即使汽油價格上漲，仍無礙消費增加。相對四到五個月前，市場一片悲觀，投資者咀邊都掛著「雙底衰退」，現時卻只聽到「經濟復甦」，反映投資者預測美國甚至全球經濟轉彎向上。
一片樂觀氣氛，資金不斷湧入股市。不過，有分析員預警，指出美國近期的好景情況，與此前連續兩年的「春季狂熱」好相似。2010年3月至5月，美國每月職位增加30.9萬個，首季經濟增長2.7%，但主要受惠於企業在金融海嘯後重新入貨所致；而去年的2月至4月的就業改善步伐亦差唔多，每月都有超過20萬個職位增長。但大市升到4月底就隨住油價急升，美國赤字預算爭拗，日本大地震爆煲，全世界股市一路插到年底才見喜色。今年情況又係差唔多，會唔會歷史重演，今年的又來一次「春季狂熱」，夏天爆煲？
睇燃油價格暴升，以及歐債仍存在不穩定因素，大市好似去年咁急轉彎的機會不無可能。不過亦有分析員有唔同意見，認為今年形況與前兩年有好大分別，主要分別係美國人已經濟降低了負債水平，已開始向銀行借錢消費，耐用品市場停滯了一段日子，產品變舊了需要更換令需求增加。另外，佔了美國消費市場60%的兩個收入階層，收入今年明顯長，將推動美國消費市場增長，成為經濟持續復甦的動力。不過買股票時保留一點戒心，唔好一面倒睇好，點都無錯。
陸羽仁
沒有留言:
張貼留言