2012年01月18日
昨日傳來標準普爾再調低歐洲金融穩定基金(EFSF)的壞消息，但出埋呢個近期最後一個壞消息，就係睇好夾淡友之時，美股期貨昨日港股開市時段，已經不跌反升幾十點，香港期指開市升200點，沽咗期指過夜嘅淡友大叫「有無搞錯？」佢哋見到壞消息，以為個市會插可以食胡，點知係詐胡，不跌反升，仲畀人截埋胡。
輸就要認輸，如果淡友唔認輸，咁就大鑊啦，個市一路夾上，回都唔回吓，最後恒指收19627點，急升615點，大升3.2%，期指仲邪，升666點，三條六收場，高水58點，成交升番上680億，升市成交配合，小心向上升勢未完。
表面看歐洲短期壞消息盡出，中國公佈經濟數據又比預期好，造就大市向上。但我認為環球大市背後還有炒作因素，早前太多人睇淡，沽空盤太多，基金持貨少，朝反向一夾，大市一升，大量淡倉被迫平倉，基金亦要追貨，好易順勢而去，咁搞港股炒上20000點大關都唔出奇。
內地經濟勝預期
你可能問升到乜位見頂，若論期指市場，係一個對賭遊戲，打到分勝負為止，力強者勝，你愈唔信，強者要夾到你爆，夾到你投降平倉接佢啲貨，才會收手，通常係升穿大位，或者見到一個應升唔升高位橫行時，才會見頂。
不過中國經濟數據的確係一個升市好理由，內地昨日公佈去年第4季度國內生產總值(GDP)增長8.9%，較第三季度增長9.1%，雖然已經放緩，但第4季增長還是高於市場預期8.7%，更特別是第4季比第3季還有按季度增長2%，即是第4季實數不退反進，肯定經濟唔係硬着陸。2011年全年GDP同比增長9.2%，與市場預期相若，雖然低於2010年的10.4%，但2010年對比09年基數較低，所以2011年對比基數較高，有增長9.2%都算唔錯。
若果股市要跌，睇到呢啲數，可以話中國經濟唔係咁差減少阿爺放水意欲，可以看成利淡消息，但唔好忘記內地股市早前連跌4日，又回到接近低位，見到經濟數據好就借勢炒番上，上證綜指報收2298點，大升4.2%，上海深圳兩市成交回升到1383億元人仔。昨日上漲幅度較大的行業為有色金屬、水泥等經濟周期行業，另有消息話南方有省份打算用1000億養老基金入市，觀乎上升股是周期股為主，相信是經濟數據影響較大。
炒完一輪再算
睇番本地，若論拉升大市力度，要數權重的兩地金融股，大笨象滙控(005) 
威番次，以近全日最高位收市，重上61元樓上，升3.3%至61.6元，推高恒指87點。中資金融股仲勁，恒生中國H股金融行業指數大漲4.6%，靠投資收益的保險股食到應內地股市彈升，佢哋近日跌得最傷，反彈亦最勁，國壽(2628) 升7.1%，平保(2318) 升7.6%。四大銀行以中行(3988) 最威，升4.1%。
香港跟內地炒有色金屬股，國內媒體轉載有色金屬工業「十二•五」發展規劃，預計國內有色金「十二•五」期間年均需求增長7.4%，瑞信認為金價與金礦股(尤其中港金礦股)分野擴至多年高點，內地金礦商發展潛力大，內地金礦股估值則跌近歷史低點，給予金礦股「增持」評級，當中以中金國際(2099) 、紫金(2899) 及招金(1818) 為首選。紫金A股漲停板，H股勁升12.5%至3.43元。其他金屬資源股亦升到癲，江西銅升9.2%至19.14元，中國鋁業(2600) 亦大反彈8%至3.86元，係藍籌股升市冠軍。
股票早前跌得多，價格較便宜，反彈起上來都可以好粗暴，若果升市持續，可以一個個行業咁輪住炒一浸。唔理歐債點，反正年頭炒完一輪再算。
陸羽仁
沒有留言:
張貼留言