食雲吞一定要加美極

好多人都好怕美極的氣味，覺得嗰啲味太搶同好臭，但有啲人，好似我愛人的弟弟，便白飯都要撈美極來食，我公司飯堂就好喜歡整一味叫美極豬扒的東東比大家食，搞到我次次都絕食。我雖然好怕美極豬扒呢樣嘢，不過如果我食我細細個食到大的白菜豬肉雲吞，我就一定要加美極鮮醬油嚟食！今日我又整咗啲雲吞食，我加了好多好多好多薑汁，因為白菜太涼，女仔食唔太好！白菜豬肉雲吞其實好易整，只要加啲麻油，加啲酒，加啲薑汁，加啲胡椒粉，加啲雞粉，加隻蛋黃，再加多啲美極鮮醬油，斤半水餃皮，一斤碎豬肉，同一斤白菜，包到100隻，拌和醃好的碎豬肉，可隨喜好加入冬菜、葱，醃一會等菜出哂水，包埋一齊就得！如果好似我咁怕食皂水的話，就要買上海皮包，白色嗰隻雲吞皮，有圓有方，我多數會買圓形嗰隻！營養師忠告最好不要吃多過15隻！未包時已經加了好多好多美極，但我食嗰時還要加多啲！煮得太多，食唔哂．．．．．．．有60多隻未煮嘅放在冰格慢慢食，用個大碟排好佢，保鮮紙舖底，唔好癡住排，放入急凍，大概半個鐘到一個鐘就硬曬，放保鮮袋，食足一個禮拜～

圖中雲吞已在雪櫃一天雪硬了，因為有保鮮紙舖底，所以保存完整。