大暑

天晴酷熱，氣温最高33度。大家知唔知道今天是大暑呢？我啲同事個個熱到頭暈身慶，有啲仲話會中暑．．．話叫我飲啲冬瓜水云云。

真係熱到唔講得笑，我見到啲西裝友，無公司車坐，又要行路去附近的公司見客傾生意，着住套老西，都幾係嘢o架，如果話邊行邊飲下水降温，行行下要揾洗手間都幾煩！唔通一到個客到就話要去厠所咩！

難怪啲維他奶同屈臣氏蒸餾水工人要罷工，氣温同物價都狂升，人工加嗰幾個巴仙真的追得上通脹嗎？天時暑熱，體力勞動，真係辛苦錢嚟o架！有人可能覺得佢地揾萬幾蚊人工已好多，不過我見好多人一年紀大咗就唔可以再做呢的工啦。如果唔再做，啲病痛又會走哂出嚟！

我記得我細個嗰時真係無咁熱o架，我屋企以前都無裝冷氣嘅，打開大門就有自然涼風吹送，真係錜起都覺得涼呀！

唔通氣候真的暖化得咁利害？我朝朝早返工都全身濕哂，好似濕水鴨仔咁，想唔病都難。

呢個週末，咁鬼熱，都唔知出唔出街行好？如果去書展，又唔知會唔會多人到焗熟咗。天氣咁熱，唔知其他人係點過的？