講是講非

小時候，老師教我們不要說謊，不要在別人背後說人不是，那時的我是十足相信同認同老師的。

及後，當我長大，出來做事，我才發覺，這個我小時候深信不移的做人原則，其實都幾"昂居"和徹頭徹尾行不通的！

好似公司每年都有津貼比員工搞活動的，如果老細年年都食開同一間老餅酒家，我幫佢傳張Circular出嚟問你想唔想去嗰到食，唔通你會填你想食Buffet咩？你想唔撈嗎？

又例如你明知呢位同事做人好唔負責任成日瀉膊，你為免得罪佢，你又會唔會對佢講，你好鬼討厭呢？

在這個時刻，我相信一個有正常智商的人都會講咗啲同自己想法相反的答案出嚟的。

講是非，表面上好似係一件壞習慣。但是，講是非其實是一件必須同十分有建設性的行為來的。比如，公司人事有什麼大變動，如果你平日習慣同同事講是講非的話，你就可以容易早一步收到風，作出相應的行動或不動啦！

所以，好多時，我都唔會怪我公司的一些有心同事、先生、小姐、師奶們，平白無段段打來找你傾計講是非同收風的！

其實，你地豎起條尾，我都知你想點。我好細個好似住過黃大仙，及後又在黃大仙聖母書院讀過書，所以我都會學習黃大仙有求必應的精神，放啲料比我的八卦同事聽，分享下。

自動放料，等食飯時有多啲話題，增進大家的感情。美麗的大話，人人都愛，提升企業和諧。正如馬時亨馬局長臨走時拋低嗰句『政通人和』，未就係叫你多啲吹水灌水，唔好搞咁多對抗囉！