三姑出山

商台終於叫番吳君如返來電台，主持嘩嘩嘩打到嚟，打救收聽率下降的商台。我以前有時聽唔切嘩嘩嘩，都有比錢商台上網聽，再抄落MP3再聽。但是，自從三姑無做之後，我都無再續商台網上電台了。

現在君如再開節目，聽聞只出山幫商台做三個月就唔會再做啦。我唔會再比錢聽商台了，因為唔想比無情無義的商台賺錢。比佢抄咗的大班又話開台，香港人網又話搞上市，網上又有得download電台節目落來聽，我想商台都幾頭痕。

新拍君如的主持人是一位叫阿哩的"茂利"，阿哩好似係新丁，頭幾集有啲緊張，拍君如有啲怯，唔係幾好聽。

好彩三姑同商台叫番歷來的嘩嘩嘩主持人如阿力、阿澤、蘇民峰等回來做嘉賓，一來撐場面，二來又可以為阿哩上下堂。本來以往拍嚫吳君如的男主持都可以紅起來的，不過蘇師傅話未必喎！唔知係唔係唔想人地覺得佢係君如捧紅，所以咁講啦？

話說回來，三姑以前真的陪我度過好多好多個寂寞的晚上，我家姐以前有軟硬，後來有君如，都是不可多得好聽的搞笑電台主持人。宜家啲主持人，講娛樂新聞都講到好似新聞報導咁，真係要同君如姐學下嘢呀！

有時聽電台都是想開開心心的，你有無內容都唔係咁緊要，我只係想聽下節目主持有互動，你估個個好似陶傑同蕭若元咁下下可以引經據典咩？打打罵罵、笑下咁都可以好過癮嘅！三姑以前同阿力做節目，有三份二時間，都係得三姑把笑聲啦！你有幾時唔係又笑埋一份o架？

三姑，三姑我愛你！