下一步11月初可能又炒美國聯儲局會唔會推出QE3(第三次量化寬鬆)救市

焗賭
2011年10月28日

　　歐盟終於拿出解決歐洲債務危機的方案，歐洲股市大幅向上，帶動港股急升。恒指早上平開，但好快就由跌轉升，而且愈升愈有，以接近全日最高位收市，勁升622點，收19689點，升幅3.3%，期指更升742點。國企指數重厲害，大升515點，造10566點，升幅超過半成！港股連升5日，恒指累積升幅超過1700點成9.5%，國企仲勁，5日升近一成半！

　　大市成交亦配合，大幅增加至939億元，顯示大市升穿19000點大關再破位向上後，有基金追入補貨。

　　昨日內地股市唔得，溫總講完要「微調」，但官方馬上搬番人民銀行長周小川的舊講話出來，話「貨幣政策不變」，為溫總的講話降溫，所以外圍升得好勁，上證綜指卻無火氣，只微升0.3％。

　　方案出台 歐股大升

　　真正刺激起大市的是歐盟峰會定出拯救危債的框架方案，包括歐洲援助基金(EFSF)以槓桿借貸形式擴大到1萬4千億歐羅；歐洲銀行將增資大約1060億歐羅，以達到明年中前一級資本率去到9%的要求；希臘債務減值50％，比7月時減值21％協議，大幅提升。至於如何落實各項計劃的細節，相信仍有一崎嶇路途要走。

　　證券界分析普遍認為，歐盟救市方案的「火力」雖然同市場期望的「火箭炮式」仍有一段距離，但「勉勉強強的方案」總好過「模模糊糊的方案」。日本央行決定將量化寬鬆的資金規模再由15萬億日圓擴大到20萬億日圓，以壓制日圓因為歐債危機消減而升值。

　　量寬概念 又有得炒

　　在港股交易時段，德、法股市已升3％以上，扯住港股向上，淡友被殺到血流成河，昨日又有超過30隻熊仔被打靶。

　　美股一直炒上，有少少破位向上趨勢，美股交易員都跌眼鏡，因為按過往經驗，呢啲期待以久的事件，出台前已炒上，出台後會回吐。今次歐洲出台的救市方案可說OK，但又未至好驚人，不能排除歐債問題靜幾個月又會復發，為何仲有咁大力炒上呢？交易員的其中一個解釋，係大量對沖基金今年輸得錢多，而家剩番一季，好多人想追數，所以焗住提升風險胃納，大手買貨博個市上，多多少少有點焗賭意味。炒完歐洲救市方案，下一步11月初可能又炒美國聯儲局會唔會推出QE3(第三次量化寬鬆)救市。

　　我就話呢啲市好難玩，長線睇股票仍然便宜，但中短線彈得愈高風險就相應上升，唔好期望環球金融市場一帆風順。不過而家啲散戶好醒，跟住大市方向走，都係炒一日鮮兩日鮮，唔會同佢談戀愛。

　　陸羽仁