2012年02月10日
中國公佈1月通脹率比預期高，影響放水期望，叫做殺一殺中港兩地升市的銳氣，內地上證綜指亦只是微跌0.1%。
中國1月通脹率CPI同去年同期比較漲4.5%，和上月比較也回升，遠比市場預期的4.1%高，以食品價格特別是菜價漲幅最大，1月菜價同去年同期比較上漲23%，按月更升26%，單是此項已解釋了實質CPI比預期高0.4個百分點的所有原因，可見通脹主要食品價格上升造成，雖說有提早過年的因素，但去年菜價按月只升10%，今年升26%真係特別多。反映工業品價格的1月PPI只漲0.7%，遠比12月的升1.7%低，創26個月新低，符合市場預期，PPI顯示經濟的確弱，當中工業品出廠價中的加工工業價格下降0.9%，反映加工出口貨品正在跌價，成本上漲產品跌價，出口企業都幾傷。
散戶開始「扒地」
CPI回升意味通脹唔係咁低，特別食品價貴影響民生，但影響中央放水的決定。疲弱PPI顯示經濟差，一般意味後續的通脹不會高，所以若無疲弱的PPI數字，股市可以跌多好多。復旦大學中國社會主義市場經濟研究中心教授殷醒明話，CPI反彈，主要源自於春節假日因素，佢認為，今年通脹的回落趨勢不會改變，未來CPI仍然會往下走，預計2月份的CPI會在4%以下，3月份則更低。目前已略為寬鬆的貨幣政策不會大變，至少在第一季度不會有太大的調整。德銀大中華區首席經濟師馬駿認為，中央放水的速度會減慢，佢原來預計今年頭9個月會減3至4次銀行存款準備金率，而家將估計調低到2至3次。
我睇完中國1月CPI就知甚麼回事，人民銀行11月減咗存款準備金率，一般估佢隔兩個月到1月會再減，結果無減，只是在過年前用「逆回購」(在市場買債券)的方式放水紓緩銀根，原來因為1月CPI反彈兼食品價大升，唔可以在呢種環境下減存款準備金率，所以減存款準備金率的步伐似會放慢少少，不過若CPI跟住回，2月或3月仍然有機會減一次。
昨日大市唞吓氣，收市仍未上破250天線，但仍險守兩萬一關，恒生指數收報21010，微跌8點；國企指數收報11669，跌36點，成交金額由昨日761億，大增至901億元。即月期指收報20954，跌169點，低水56點。
資金仍然在大玩追落後遊戲，三、四線股不少玩跳彈牀，單日就升十個、八個巴仙，朝早播種，夜晚已經收割。好似市傳內地放寬首套房貸款限制，內房股仔鴻隆(1383) 
大炒落後，一度升逾四成，最後收報0.228元，大升30%。對老散嚟講，股仔跳舞，「扒地」而家開始，咁先真正好玩，懶得理你指數上定落。
賣樓極差股照升
紅色股份繼續抽升，內房股表現最妙，1月賣樓情況極差，但消息無損股價照升，好似隻龍湖(960) ，公佈1月銷售11.8億人幣跌72%，按年下跌72.3%，按月則下跌55.5%，賣樓賣12億都唔夠，只係以前月銷售的零頭數。
龍湖自己解畫，話農曆新年前後受季節因素影響，行業單月銷售亦為全年最低，另外龍湖1月份亦無集中推盤，供貨量亦處全年最低水平，所以1月銷售受到一定影響，未來將在多地增加供貨推售。
我估除龍湖外，其他內地發展商都無乜邊個賣樓賣得好喎，但妙就妙在龍湖昨日仍大升4.3%，皆因內房股隻隻升。中環茶友話，呢兩個月升市唔止散戶追唔切，芬佬一樣追唔切，而家追到內房呢啲落後行業，主要原因係佢地跌得多而已，追緊貨時闔埋眼買，對壞消息聽唔入耳㗎，芬佬怕唔追個市一條氣咁升，自己無功課交呀。
陸羽仁
沒有留言:
張貼留言