芒之密碼

Mango飲食男女 第 732 期
一分鐘揀芒果必勝法

芒果年年有，今年特別多。

走一轉街市超市，同一樣事物，怎麼變成如此琳瑯滿目。

黃的青的紅的。巨的大的中的小的迷你的。

中國的泰國的台灣的菲律賓的印度的巴基斯坦的。

腍滑的多汁的爽脆的酸香的。

揀一個靚芒果，難道要先啃一本百科全書？

套句電話保險推銷員口脗：一分鐘。

先生，只係阻你一分鐘。

等芒果達人同你解釋番，點樣喺一分鐘之內揀個靚芒果。

邊個係芒果達人
蕭敏熙師傅，東海堂製作部總管，今年五十二歲，從事西餅及甜品製作二十三年，主力創作芒果蛋糕甜品，至今創作超過一百五十款，涉獵各國芒果，可謂閱芒無數。

芒果達人親授：一分鐘揀芒法
1. 夠墜手：兩個相同大細，邊個墜手啲，就即係好啲。

2. 椗夠香：唔使成個都有香味，最緊要聞吓個椗香唔香，香就啱啱好。

3. 身乾爽：果體要乾爽，黐即滲出糖分，表示開始熟到爛。

4. 冇黑點：黑點代表果肉已受細菌侵害，開始腐爛。

芒果小百科
芒果學名Mangifera indica，原產自北印度和馬來半島，至少已有四千年，明朝時由荷蘭人引進台灣，芒果開始在中國大地出現。

經過多年改良傳播，產地已及印度、墨西哥、巴基斯坦、泰國、中國、印尼、菲律賓、海地、剛果及美國佛羅里達州、加州等地，各有不同香味及形態。是繼葡萄、柑橙、香蕉、蘋果之後的世界第五大水果。

芒果是熱帶生果，每年5-10月當造，成熟後會軟化易爛，不耐運輸，因此果農大都在七、八分熟就採收，再以人工催熟上市。

成熟的芒果不耐擺放，最好一買即食。未熟的芒果，可放在米缸或用報紙包着自行催熟，但不要放進雪櫃，因為芒果冷藏會停止成熟，果肉也會變嚡，香味消散。

論盡世界芒果
揀靚芒，先要揀到合自己口味的芒果。芒果來自世界各地，種類多籮籮，有香有甜有腍有實有肉多有肉少……哪款才是你心水？

泰國青芒$25/2個（三泰）
皮青色，中等身材。芒果味極濃，酸多過甜，最特別是肉不是腍的，是爽的，泰國人最愛用做沙律，中國人則會用糖和白醋醃來做零食。

泰國青水仙$12/3個（甜心）
皮青，軟腍少纖維，芒果味較淡，宜做泰式沙律，不宜當生果吃。

印度阿芳素$22/個（印度商店）
比巴基斯坦芒小一點，芒果味不算突出，卻有朕香料氣味，很印度。肉質實而多纖維，甜度極高，最合做雪糕，芒果味不會被奶味掩蓋。

中國海南芒$14.9/4個（Apita）
產自中國海南島，芒果味不俗，多汁，但纖維極多，不夠細滑，適宜榨汁做布甸，不過一定要隔渣。

菲律賓呂宋芒$10/個（富榮）
聞名的品種，纖維少，肉質滑，甜度適中，價錢平。

本地大部分甜品店同餅店都用它。

分S/M/L/SL四種大細，SL味道最好，但市面少見，因為都給甜品店及餅店買晒！

巴基斯坦芒$14/個（印度商店）
體形僅次於台灣金煌芒，皮皺而厚，肉味濃甜，淨吃嫌膩，適合做芒果鮮奶等飲品，以減低甜膩。

台灣愛文芒$22/個（city'super）
台灣產量最多品種，引種自美國愛文芒(Irwin)，果皮深紅帶斑點，皮薄肉細、汁多纖維少，有椰子味及淡淡芒果味，合淨食或做甜品。

台灣金煌芒$17.9（Apita）
美國種及台灣土芒混種，體形巨大，為芒中之最。

集美國種肉厚及台灣種味香於一身，實淨滑溜，果肉大塊，中廚愛以其入饌，取其炒極都不易爛。

台灣黑芒$26/個（city'super）
青BB，一撻撻，外貌醜陋。

皮薄肉厚，芒果味淡，卻有濃重荔枝味，合生吃。